Бұл кітап менің сапарымның кейбір маңызды сәттерімен бөліседі, менің өмірімнің үлкен бөлігін және еліміздің тағдырын қалыптастырған адамдар мен оқиғалар туралы жарқын естеліктерді қайта жаңғыртады. Соған сәйкес, мен өзімнің 50 жылдық еңбегімді 50 тараудан тұратын кітаппен белгілеп отырмын. Мен бұл жеке белестерді болашақ ұрпаққа түсінік пен шабыт береді деген үмітпен өз отандастарым үшін жазып қалдырдым.

Бұл — толық емес жазба, сүйікті ұлтымыздың тарихын құжаттаудың және оны келешек ұрпаққа сақтаудың кішкентай ғана бөлігі. Алдағы жылдарда әмірліктер бұл жазбаларға біздің бұрын кім болғанымыздың дәлелі ретінде, сондай-ақ Жер бетіндегі ең қарқынды және табысты елдердің бірін қалай құрғанымызды білу үшін жүгіне алады. Біздің жалғыз тілегіміз — келешек ұрпақтың өздеріне мұра болып қалатын болашақты құру үшін біздің қаншалықты тер төккенімізді көруі.

Мен оқиғаларды есімде қалғаны бойынша және сол кезде жазған күнделіктерімнің, өлеңдерімнің және басқа да жазбаларымның көмегімен қағазға түсірдім. Бұл естеліктерді уақыт мүмкіндік берген сәттерде, болашағымызды қалыптастыру жолында өткенімізге сүйене аламыз деген үмітпен жазып отырдым.

Біз сапарымызды осыдан 50 жыл бұрын: «Шын ниетпен еңбек етіңдер, сонда Алла және мүміндер сендердің еңбектеріңді көреді», — деген сөздерді басшылыққа ала отырып бастадық. Алдымыздағы жол әлі ұзақ және халқымыз бен ұлтымыздың игілігі үшін қалыптасқан біздің пайымымыз әлі толық жүзеге асқан жоқ. Біз әрқашан адамдардың бойынан жақсылық іздейміз және олардың әлеуетін баршаның игілігі үшін дамытуға тырысамыз. Дағдарыстар бізді тоқтата алмайды, кедергілер бізді баяулата алмайды. Біз күмәндану арқылы кідірмейміз де, тоқтамаймыз да.

Осы қарапайым сөздерден сіздер аздаған даналықты және менің ұлтыма, БАӘ-дегі және бүкіл әлемдегі бауырларыма деген сүйіспеншілігімнің көрінісін табасыздар деп үміттенемін. Мен оларды сіздермен, бәлкім, жастарымызды, араб жастарын және барлық жердегі жастарды шабыттандыруға немесе үйретуге көмектесу үшін бөлісіп отырмын. Сіздер де біз сияқты жақсырақ Отан құруға, болашаққа және әлеміміздің болашағына деген үмітті таратуға ұмтыласыздар.

Аса қамқор, ерекше мейірімді Алланың атымен. Сіздің бауырыңыз, Мұхаммед бен Рашид Әл Мактум

2017 жылдың 6 желтоқсаны — менің есімде ерекше сақталған күн. Мен ерте тұрдым, бірақ таңғы асты сағат 11-ден кейін ғана іштім, өйткені таңертеңгі уақыттың көп бөлігі жаңа және өте қызықты жобаға арналды. Бұл жоба ұлтымызды жаңа және күтпеген бағытқа бастайтын еді. Мен қиындықтарды (challenge) жақсы көремін, өйткені даму мен эволюция «мүмкін еместі» талап етуден туындайды деп сенемін. Көкжиекке көз тігу жақсы-ақ, бірақ адам баласы одан әріге қарау арқылы ғана қиялын толық іске қосып, нағыз жетістіктерге шабыттанады.

Бұл жаңа мақсат шынымен де ерекше болды және мен оны халықтың қиялын ояту үшін пайдаланғым келді. Мен хабарламаның анық болғанын қаладым: мүмкін емес нәрсе жоқ, біздің ұлтымыз бен жеңіске деген жігеріміздің жолында ешқандай кедергі тұра алмайды.

Біз бұл жобаны дамыту үстінде бірнеше жыл бойы тыныш жұмыс істедік. Біз командамызды құрдық, әлеуетімізді арттырдық және халықаралық серіктестіктер орнаттық. Біз ғылым саласындағы мүмкіндіктерімізді ілгерілету үшін жаңа және өршіл жолға түстік. Сол күні кешке мен 15 миллионнан астам әлеуметтік желідегі оқырмандарыма жобаны жарияладым — Халықаралық ғарыш станциясына алғашқы БАӘ ғарышкерлерін жіберу.