Еңбек фольклоры
Бабалар сөзі
Жазылымсыз режим: 20-беттен кейін жазылым беті ашылады, әрі қарай әр 10 бет сайын (ең көбі 5 рет).
20 px
1.85
0.30 px
0.95 em
Еңбек фольклоры
«БАБАЛАР СӨЗІ» СЕРИЯСЫНАН
МОҢҒОЛИЯДАҒЫ ҚАЗАҚ ФОЛЬКЛОРЫ
Мал шаруашылығына байланысты фольклор
Мал шақыруы
Қой баласы қоңырым,
Ұя баспас момыным,
Шопан ата түлігі,
Қошақаным, қайдасың?!
Пүшәйт-пүшәйт!
Жүнін жұлса бақырған,
Шекшек атасын шақырған.
Өрісте өскен жануар,
Шөкетайым, қайдасың?
Шөре-шөре!
Жолға шықсам көлігім,
Жапанда жүрсем серігім.
Қамбар-ата өсірген,
Құла атым менің, қайдасың!
Құру-құру!
Алла Тағала малды жаратып: «кімге бітесің?», – деп сұрайды:
Түйе тұрып:
– Жаз таусылмас сорға бітемін,
Қадірімді білетін зорға бітемін.
Жылқы айтыпты:
– Бетегелі сайға бітемін,
Берекелі байға бітемін.
Сиыр тұрып:
– Қамысты нуға бітемін,
Түк шықпайтын қуға бітемін.
Қой айтады:
– Жусанды аққа бітемін,
Баққа емес, бапқа бітемін.
Ешкі тұрып:
– Туғанда қасқа бітемін,
Қызылшалы тасқа бітемін, – десіпті.
Шөліркеп азған сиыр сұңқылдаған суырға келіп мұрынын шүйіріп:
– Суыр, сасық су қайда? – десе, суыр: – Сиыр, сасық су мұнда, – деп інінен шыққан шалшық суды көрсетіпті. Суыр сасық сусыз өмір сүріпті. Сиыр сасық сулы жерге бітіпті.
Өгіз арманы
Мөңкіл-мөңкіл басым-ай,
Елу сиыр, қырық тайынша
Келуші еді қасыма-ай!
Ел жайлауға шыққанда,
Елдің алдын бермедім.
Ел етекке түскенде,
Көштің шаңын көрмедім.
...Құнан бұқа болғанда,
Мұрнымды тесіп үйретті.
Дөнен бұқа болғанда,
Шана жегіп сүйретті.
Үлкен бесін болғанда,
Үйге таман айдады.
Кіші бесін болғанда,
Белдеуге әкеп байлады.
Жатайын десем, айылым бар,
Айналуға жерім тар.
Көзім оттай жайнайды,
Ішім тұздай қайнайды.
Мал деп мені бақпады,
Сырып, жабу жаппады.
Мөңкіл-мөңкіл басым-ай!
Елу сиыр, қырық тайынша
Келуші еді қасыма-ай!
Әттең, менің арманым,
Ар жаққа өтіп қалмадым.
Желідегі бұзауды
Бір өкіртіп алмадым!...
Мөңкіл-мөңкіл басым-ай!
Елу сиыр, қырық тайынша
Келуші еді қасыма-ай!
Пікірлер (0)
Пікір жазу үшін аккаунтқа кіріңіз. Кіру