Қорғанбек Аманжолов (8.11.1953 жылы, Көкшетау облысы, Зеренді ауданы, Көктерек ауылы) — журналист, БАҚ ісін ұйымдастырушы..
Әл-Фараби атындағы Қазақ ұлттық университетін бітірген (1975). Еңбек жолын 1974 жылы Зеренді ауданы "Коммунизм таңы" газетінде тілші болып бастаған. 1977-89 жылдары облысы "Көкшетау правдасы" газетінде меншікті тілші, мәдениет әдебиет, жауапты хатшы, 1989 жылы Қазақстан Жазушылар одағының "Жұлдыз" журналында көсемсөз бөлімінің меңгерушісі, 1990 жылы республикалық "Дала дидары" ("Ауыл") газеті бас редакторының орынбасары, 1993-94 жылдары "Жұлдыз" журналында бөлім меңгерушісі, "Дәуір-Время" газетінде жауапты хатшы, республикалық "Сұхбат" газетінде, "Қаржы-Қаражат" журналында бөлім меңгерушісі, Талғар ауданы әкімінің аппаратында бас маман, "Хабар" Агенттігінде дубляж редакторы болып қызмет атқарған. Қазір республикалық "Егемен Қазақстан" газеті Алматы бөлімшесінің жетекшісі.
"Жалын" баспасының шыққан "Тың тынысы" (1976), "Қарлығаш" (1986) ұжымдық жинақтарына топтама өлеңдері енген. 2001 жылы А.Смыковтың "Бақыттың жолы бұралаң" атты ғұмырбаяндық хикаятын аударған. 2002 жылы "Зеренді карағайлары" атты жыр жинағы және "Ғибраты мол ғұмыр" атты сериямен "Мақтай Сағдиев" деген хикаят-эссе кітабы жарық көрген. "Ғибрат пен Зұлмат" (2004), "Біржан бұрмалары" (2006), "Бірәлі дастан" (2007), "Сабат" (2008) проза және өлең кітаптары бар. Көркем аударма саласында жемісті еңбектеніп келеді.
О.Жанайдаровтың "Ежелгі Қазақстан мифтері", "Ежелгі Қазақстан аңыздары", "Ежелгі Қазақстан әфсаналары" атты тарихи-танымдық кітаптарын, Герман Меллвилдің "Моби Дик немесе Ақ Кит" романын тәржімалаған. "Қанай-Абылай" атты тарихи дастан жазып жариялады.
